Gilas Pilipinas nakalingkawas sa kabangis sa New Zealand sa MVP CUP

CEBU, Philippines - Nangigo si Terrence Romeo sa final period aron pangulohan ang Gilas Pilipinas sa usa ka kulbahinam nga ‘come-from-behind’ nga kadaugan batok sa New Zealand, 84-81 sa MVP Cup kagabii didto sa Smart Araneta Coliseum.

Sa maong kadaugan, ang Gilas misaka sa 2-0 record sa maong four-team pocket tournament.

Si Romeo, kinsa padayong mipakita og nindot nga duwa sa unang higayon niya  sa national team mitapos og 18 puntos lakip na ang upat niya ka tres sa final period.

Ang New Zealand milabaw og double digits sa third  period, apan gikalingawan kini’g kitkit sa Gilas hangtod nga nailog nila ang labaw dihang nanginit si Romeo sa final quarter.  

Wala kaayo kaarte  ang  naturalized center sa Gilas nga si Andray Blatche,  apan gitubos kini sa mga lokal sa pagpangulo nila ni Romeo, Calvin Abueva ug Jayson Castro.

Ang Gilas motapos karon sa maong pocket-tournament batok sa Chinese Taipei. Ang Chinese Taipei usa sa mga gipaabot nga kontra sa Gilas sa  FIBA Asia Championship karong Septiyembre 23 didto sa China.  (BANAT NEWS)