Mertens daog sa Orione, Savio nagsolo na’s Don Bosco HOOP

CEBU, Philippines - Ang three-pointer ni Kim-Kim Rebosura sa himalatyong segundos maoy mibaswat sa  Don Alos Mertens ngadto sa kadaugan batok sa St. Louis Orione, 74-65 sa Group B sa Don Bosco@200 Alumni Basketball Tournament niadtong Sabado.

Midaog sab ang St. Dominic Savio aron magsolo sa standing sa Group A bitbit ang 3-0 nga baraha human gilatos ang Don Bosco Technology Center (DBTC) Passarelle Greywolves, 82-56 didto sa DBTC  parque   hardcourt sa Punta   Princesa, Cebu City.

Bitbit ang 2-1 nga baraha sa unom ka teams, ang Mertens nag-una na karon sa Group B human ang Don Bosco Cebu Alumni, Inc. (DBCAI), ang organizer ug governing body sa torneyo mipahamtang og silot ngadto sa team St. Callistus Caravario tungod sa kalapasan.

Ang DBCAI mibakwi  sa kadaugan sa Caravario niadtong Agosto 22 ug gihatag ang daog ngadto sa team Fr. John Peter Clifford nga mibutang sa tanang koponan sa Group B sa baraha, 1-1 hangtod nabuntog sa Mertens ang Orione sa ilang duwa niadtong Sabado.

“Gihukman kini sa DBCAI Board uban sa mensahe nga sagrado ang mga lagda sa torneyo ug sa ubang  sports competitions nga pasiugdahan o  pagadasonan sa DBCAI sugod karon,” matud ni   DB@200 commissioner   si Cerwin T. Eviota nga kasamtangang  bise presidente sa DBCAI.

Si Celso Colegado miiskor og 33 puntos alang sa Mertens, lakip ang tulo ka triples ug duha ka jumpers sa first period nga naghatag sa koponan og 15 puntos nga labaw. Apan ang Orione mibawos sa second quarter dihang si Jules Asignar mipabuto’g 13 sa iyang 29 puntos aron  tapuson ang first half, 37-36.

Sa laing bahin, ang playing team manager nga si Ian Brigoli miiskor og 22 puntos ug si Arbinson Gabison miposa’g 20 puntos aron pangulohan ang team Savio alang sa ikatulong sunod-sunod nga daog dihang ila sab nga gipahamtangan ang Greywolves sa ikatulo sab nilang sunod-sunod nga pilde.  (BANAT PALARO)