Cebuano karatekas nanghawod sa Surigao
CEBU, Philippines – Bisan og upat lamang sila ka buok, apan maayo gihapon nga labok ang gipakita sa Sugbuanong karateka hinungdan nga nalandig sila sa ikatulong puwesto sa 1st Mayor Ernesto T. Matugas “Bonok Bonok Festival Karatedo Invitational Cup” nga natapos niadtong Domingo didto sa Parkway Mall, Surigao City.
Si coach Larry Avila nagkanayon nga ang tanan niyang upat ka mga batos pulos nakakuha og bulawang medalya nga gipakapinan pa nila og tulo ka silvers ug usa ka bronze nga igo kaayong naghatod kanila sa ikatulo nga puwesto.
Si Warlito Ponteros sa Cansojong National High School maoy nangu sa Team Cebu human mihakot og duha ka gold medals sa junior ug senior kata competition. Mibira sab siya og bronze sa -55kgs. kumite.
Ang garbo sa University of Cebu nga si Joshua Phillip Famador midaog sab og gold sa -60kgs. kumite ug ingon man silver sa senior men’s kata.
Samtang ang atleta sa Sacred Heart School-Ateneo de Cebu nga si Rennier Angelo Cruz mitunol sa ikaupat nilang bulawan sa -70kgs. men’s kumite. Milabnot sab siya og silver sa 15-year-old kata event.
Ang laing silver medal gibira sa varsity sa University of San Carlos nga si Kimberly Mosqueda Gealan sa senior women’s kata. (BANAT NEWS)
- Latest
