Gilas Pilipinas milabni sa silver medal
CEBU, Philippines – Gitapos sa Gilas Pilipinas ang ilang kampaniya sa 37th William Jones Cup dala ang silver medal human sa ilang dominanteng kadaugan batok Chinese Taipei-B,96-67, kagahapon didto sa Xinzhuang Gym sa New Taipei City, Taiwan.
Ang Gilas mihipos og 6-2 win-loss record sa maong torneyo alang sa labing una nilang silver-medal sa torneyo. Nagsunod sila sa Iran (7-1) nga maoy gold medalist sa Jones Cup.
Batok sa huyang nga Chinese Taipei-B, ang Gilas migamit og balansing atake aron mahatagan og playing time ang tanan nilang players.
Nangulo sa Gilas si Gary David nga adunay 22 puntos, samtang si Jayson Castro ug Fil-Tongan Moala Tautuaa miiskor og 15 ug 12 puntos matag usa.
Gipakalitan pa sa Chinese Taipei B ang Gilas human nila gibiyaan ang nauwahi, 10-2, apan kadto ang katapusang higayun nga nakatilaw og labaw ang mga Taiwanese dihang gipabuthan sila sa opensa sa Gilas.
Ang Gilas milabaw og 20 puntos sa katapusang bahin sa first half, 45-25, og wala kakita og solusyon ang Chinese Taipei B sa pag-uwan sa mga puntos gikan sa mga Pinoy.
Subling mipaarak og puntos ang Gilas pag-abot sa third period sa pagpangulo nila ni Jayson Castro ug Gary David diin mitukod sila og 29 puntos nga labaw, 82-53.
Human sa Jones Cup, isunod sa Gilas ang laing pocket-tournament nga mao ang MVP Cup nga anhi ipahigayun sa nasud. (BANAT NEWS)
- Latest
