UV daog gyud sa USJ-R

CEBU, Philippines - Nakapasulod og krusyal kaayong three-pointer ang beterano nga point guard nga si Alfred Codilla aron ituboy ang University of the Visayas Green Lancers ngadto sa 78-74 nga kadaugan batok sa University of San Jose- Recoletos Jaguars sa 15th Cebu Schools Athletic Foundation, Inc. (CESAFI) kagabii  sa Cebu Coliseum.

Pirmeng naglabaw ang Lancers, apan misikit ang Jaguars, 65-66 sa three-point play ni Ralph Dinolan  sa nahabiling 7:43 sa fourth period. Miinat sab dayon hinuon ang labaw  sa Lancers, 68-65  pinaagi sa  two-handed slam ni  Steve Cedrick Akomo ug nainat pa kini ngadto sa otso puntos, 73-85.

Ang daog maoy ikaduha sa Lancers batok sa Jaguars, kinsa ila sab gipilde niadtong Agosto 6 sa first round sa eliminasyon sa iskor, 89-82.

Ang 5-2 nga Lancers gipangulohan nilang  June Kent Manzo ug Joshue Segumpan sa ilang 13 puntos matag usa, samtang si Akomo adunay 12 puntos, apan si Codillla nga adunay 10 puntos  maoy nahimong best player tungod sa iyang game-winning triple.

Ang Jaguars nga nagtangag og 2-5 nga baraha, gipangulohan ni  Ralph Dinolan pinaagi  sa iyang 25 puntos, gisundan ni Peromengan nga adunay 13  ug Mark Labares sa iyang 10 puntos.