Duron maoy lider sa masters division sa ASEAN mountainbike
CEBU, Philippines – Ang Sugbuanong seklista nga si Jun Duron wala makatungtong sa podium sa ikatulong leg sa 2015 ASEAN Mountainbike Cup, apan gibati gihapon kini og tumang kalipay gumikan kay siya man maoy overall leader sa masters division sa miaging gabii didto sa Damai Eco Ranch sa Lohan, Ranau, Malaysia.
Si Duron mitapos lamang sa ikaunom nga dapit sa third leg nga gidominar sa usa ka Thai rider. Bisan pa man niini, siya gihapon maoy nag-una sa masters category sa natigum niyang 28 puntos. Iyang natali ang daghan niyang puntos sa nag-unang duha ka legs nga gipahigayon sa dakbayan sa Danao ug didto sa Indonesia.
Dili hinuon angayan nga mokompiyansa ang Talisaynon nga si Duron gumikan kay labaw lamang siya og dos puntos batok sa nagsunod kaniya nga si Kusnadi Adi, usa ka Indonesian nga maoy third placer sa Malaysia leg.
Ang ikaupat ug katapusan nga leg sa ASEAN MTB Cup gikatakda karong Nobiyembre didto sa Timor Leste. (BANAT NEWS)
- Latest
