Sharks mitukob sa Converters sa E-League
CEBU, Philippines – Si Archie Batua mipatuasik of 27 puntos ug milangkat og 12 ka rebounds aron pag-aswat sa Accenture Sharks ngadto sa 66-60 nga kadaogan batok sa Convergys Converters sa 11th CSCC E-League men's basketball tournament niadtong Sabado didto sa City Sports Club Cebu gym.
Si Ildefonso Bulangis, Jr. midugang og 14 puntos uban ang upat ka rebounds ug duha ka assists alang sa Sharks nga mi-inat sa ilang win-loss record ngadto sa 4-2 sama sa ilang gibiktima.
Ang Sharks alkansi og tres puntos, 46-49, human sa tulo ka kuwarter apan gitak-op niini ang duwa pinaagi sa mainit nga 20-11 nga rally aron pagpakaging sa Converters.
Sa laing duwa sa Elite Classic, ang SSI Warriors nagsandig sa nagkayong opensa ni Lawrence Daven Agas aron pagbihag sa ePerformax Reds sa overtime, 81-70.
Si Agas mitapos og 29 puntos uban ang siyam ka rebounds, unom ka assists ug duha ka steals, samtang si Dennis Noel Poquita mi-amot og 15 puntos, pito ka steals, upat ka rebounds ug tulo ka assists alang sa Warriors, nga miwani sa Reds, 19-8, sa dugang singko minutos sa ilang sangka.
Si Evo League, si Ralph Belarmino miwadwad og 32 puntos, 13 ka rebounds, upat ka assists ug upat ka steals alang sa 24/7 Cagers nga milampurnas sa Contact Solutions, 85-62, samtang si Sam Jordan Hermosa mipatuasik og 28 puntos ug 10 ka rebounds sa 107-66 nga pagmasaker sa Telstra Boomerangs ngadto sa 1&1 Marauders. (BANAT NEWS)
- Latest
