Ganting salapi madawat sa Hunat Triathlon winners
CEBU, Philippines - Ganting salapi ang iapud-apod sa mga mananaog sa “Team Challenge” ug ingon man sa standard category sa Hunat Sugbu Triathlon didto sa Argao karong Septiyembre 20.
Kumbatihan sa labing unang higayon, ang team event dunay pito ka mga entrante nga mao ang Tri Lasang, WS Tri, Metafit, Omega Pro, Repro Optima, Tri Liloan ug Ford Forza.
Matag team mahimong mopadala og bisan pila ka miyembro, apan ang maapil sa kuwentada kadto lamang ang oras sa top five finishers. Ang upat niini sa lalaki, samtang ang ikalima sa top female finisher kay matag koponan obligado man nga dunay babayi nga kauban.
Gawas sa mga tropeyo, ang makampiyon mobira og P10,000, samtang ang mopahiluna sa ikaduha ug ikatulo moangkon og P7,000 ug P5,000.
Gawas sa team challenge ug relay event, pipila sab ka mga age-groups ang salmotan sa mga entrante. Kini naglangkob sa 29-under, 30-39, 40-49 ug 50-above male ug 29-under, 30-39 ug 40-above female sa standard distance ug ang 19-under, 20-29, 40-29, ug 50-above male ug ang 19-under, 20-29, 30-39, ug 40-above female sa sprint distance.
Ang standard category naglangkob og 1.5-kilometer swim, 40K bike ug 10K run, samtang ang sprint dunay 750m swim, 20K bike ug 5K run.
Gawas sa medalya, ang manghawod sa standard distance makaangkon og P7,000, samtang ang second ug third placers mobitbit og P5,000, ug P3,000.
Ang registration nagkantidad og P2,500 sa standard ug sprint ug P2,300 matag partisipante sa relay. Alang sa dugang mga detalye, mahimong mobisita sa www.hunatsugbu.com. (BANAT NEWS)
- Latest
