UC table paddlers mobanat sa Malaysia

CEBU, Philippines - Kanunay silang manghawod sa mga lokal ug nasudnong kompetisyon, apan ning higayona masukod og maayo ang abilidad sa mga table tennis players sa University of Cebu gumikan kay mokumbati man sila sa 10th Universiti Teknologi Mar (UiTM) International Sports Fiesta didto sa Malaysia sugod karong adlawa.

Si UC athletic director Bernard Ricablanca nagkanayon nga mao kini ang labing unang higayon nga mosalmot sila sa maong tinuig nga torneyo kansang mga entrante mag-agad lamang kun imbitahon  sa mga organizers.

Mangu sa kampanya sa UC mao sila si Dannel Jay Tormis, Val Stephen Jaca, Lemuel Agbon, Herby Vince Betarmos, Fausto Zeus Comaingking ug David Samuel Maneja sa men’s division.

Samtang sila si Lezlie Agbon, Athena Comaingking, Diana Oliverio, Jerny Kaye Pepito, ug Jeramae Saromines maoy modala sa bandila sa UC sa women’s category.

Mogiya nila mao si   coach Jessica Honoridez inabagan ni Jennifer Jacalan,  ang kanhi collegiate standout sa mao gihapon nga tunghaan.

Ang maong team competition magsugod sa men’s singles, dayon women’s singles ug sundan sa men’s ug women’s doubles.  Ang katapusan nga banatan mao ang mixed doubles. (BANAT NEWS)