Clarkson gusto moduwa sa Gilas

Mipadayag sa iyang tinguha nga moduwa alang sa Gilas Pilipinas ang Los Angeles Lakers guard nga si Jordan Clarkson.

Ang Fil-American nga si Clarkson motan-aw sa training sa Gilas  karong buwana ug mopahigayun og mga basketball clinics sa iyang pag-anhi sa nasud.

Suarez mangulo sa Phl team

Ang veteran amateur boxer nga si Charly Suarez maoy mangulo sa five-man Philippine team nga moduwa sa ASBC Asian Boxing Championship sunod semana didto sa Thailand.

Ang mga Pinoy boxers maningkamot nga mudaog sa maong torneyo nga magsilbeng qualifiers alang sa World Championship sa Doha, Qatar sa Oktubre.

Bryant todo na sa ensayo

Gipakita ni Los Angeles Lakers star Kobe Bryant nga sento porsiyento na siya nga naalim sa iyang mga injury human siya misugod na og ensayo pangandam sa sunod season sa NBA.

Si Bryant nakahunat na og itsa gamit iyang bukton nga gioperahan lang niadtong Enero.

May Adlaw ra ang Tigre (Jason Day batok Tiger Woods)

Matag higayon nga dunay usa ka atleta o usa ka team nga dili sayon pildihon, ato dayong tawgon og usa ka dakung "upset" kung dunay player nga makaputol sa iyang pagdominar.

Sama niini karong nahitabo didto sa usa ka World Golf tournament didto sa Whistling Strait sa Haven, Wisconsin  diin napilde na gyud si Tiger Woods ni Jason Day human sa ikatulong higayon nga sila nagkabagat.

Dunay gitawag nga "each dog has its own day" nga literal nga gipaila ang tawo nga usa ka iro busa ang buot ipasabot nga moabot ra gyud ang panahon nga mapilde ang usa ka tawo sa usa ka kumpetisyon o bisan unsang matang sa lumba. Posible sab nga sa laing hubad, mahimong moabot ra gyud ang panahon nga dunay kataposan sa kinabuhi sa iro.

Human sila magtabla sa liderato sa ika-54 hole, nasakmit ni Day ang solong liderato ug maoy midaog sa PGA kon Profession Golf Association didto sa Whistling Straits sa Wisconsin didto sa Estados Unidos.

Mi-iskor si Day sa final-round og 67 didto sa baybayon sa Lake Michigan, aron morehistro og record nga 20-under par, nga maoy labing ubos nga nahimo sa usa ka player sa kasaysayan sa usa ka major championship sa natad sa golf.

Nakahilak si Day sa kalipay human niya mapidle si Woods, ang usa sa labing adunahan nga atleta sa Estados Unidos. Niadtong 11 anyos pa lang si Day, namatay sa sakit nga cancer ang iyang amahan  ug nahugno siya og maayo tungod sa maong hitabo hinungdan nga nahimo siyang alcoholic.

Giprenda sa iyang inahan ang ilang balay aron lang makapadayon og eskwela si Day.

Ang emosyonal nga si Day nagkanayon nga ang iyang paningkamot nagbunga aron makuha ang record bisan pa sa kadaghang maayo moduwa'g golf sa tibuok kalibotan.

Sa pagka-maayo niyang moduwa, milabaw og tulo ka strokes si Day batok kang Jordan Speith aron pakgangon ang batan-on nga taga Texas nga mahimong ikatulong golfer nga midaug og tulo ka majors sa usa lang ka season.

Nakalikay sab si Day sa mosunod nga linya nga "never won a major list " ilabi nang dihang dumadaog na siya apan napilde ni Zach Johnson sa British Open.

Ang birdie ni Day sa no. 7 maoy naghatag kaniya'g upat ka shot nga labaw batok kang Spieth ug ang boogie sa no. 8 naghatag kaniya'g kahigayonan nga  modaug sa kampiyonato.

Si Day maoy nakadawat sa Wanamaker Trophy ug  siya maoy ikalimang Australian golfer nga midaog og PGA Championship nga silang  Jim Ferrier (1947), David Graham (1979), Wayne Grady (1990) ug Steve Elkington (1995).

LAING UPSET. Diay laing upset nga atong hisgotan og dili kini sa golf course apan sa usa ka basketball court kaniadtong Agosto 18 sa CESAFI dihang naka-ipsot ang UC Junior Webmasters batok sa UV Baby Lancers sa iskor, 70-64.

Dili tiaw ang kalipay nga gibati ni UC coach Jover "Brad" Samonte sa maong kadaogan kay matod pa niya nga dugay-dugay nang panahon nga wala sila modaug batok sa  UV diin milanat na ngadto sa labing menos walo ka pilde ang ilang nahiagoman sa wala pa sila makatilaw og laing daog.

Matod pa ni Samonte nga pruyba kadtong daoga sa ilang paningkamot ug nalipay siya sa iyang mga players nga mipakita gyud og kumbate sa maong duwa. Bunga sab kuno kadto sa ilang kakugi sa praktis ug resulta sa ilang disiplina nga gituman sa iyang mga players.

Matod pa ni Samonte nga dako na niya kadtong kalipay ug mas malipay pa gyud siya kung moabante sila sa final four nga mao karo'y ilang gipangandaman.

Sa higayon nga dunay laing upset nga maimo ang UC, maka-ingon na gyud ako nga kini si Samonte mura'g si Jason Day. Ako na sab siyang tawgon nga BRAD SAMON-DAY.