UC Juniors mikatkat sa ikatulo
CEBU, Philippines - Wa’y kukaluoy nga gipanit-panitan sa University of Cebu Junior Webmasters ang Don Bosco Technology Center Junior Greywolves, 98-51 sa nagpadayong 15th Cebu Schools Athletic Foundation, Inc. (CESAFI) basketball tournament kagahapon didto sa Cebu Coliseum.
Mikamang na ngadto sa ikatulong puwesto ang Junior Webmasters bitbit ang 4-2 nga baraha luyo sa wala’y pildeng Sacred Heart School-Ateneo de Cebu Magis Eagles (5-0) ug sa University of San Carlos Baby Warriors (4-0).
Si Froilan Mangubat maoy nangu sa Junior Webmasters pinaagi sa iyang 23 puntos, si Gelmart Umpad miabuno’g 12 puntos, samtang si John Bryl Cuyos mitampo’g 10 puntos.
Tulo sab ka players sa 0-6 nga Junior Greywolves ang miiskor og double figures pinangulohan ni Reinel Niño Gabisay sa iyang 16 puntos, si Rae Adrian Duque miamot og 14 puntos ug si Lance Lim midugang og 10 puntos.
Sa laing duwa, ang University of San Jose-Recoletos Baby Jaguars mipakita sa ilang kamangtas human nila gipilde ang Cebu Institute of Technology-University Wildkittens, 77-70.
Si John Kirk Gonzaga mitusak og 18 puntos alang sa Baby Jaguars, samtang sila si Jide Benedict Teleron ug Joshua Renz Ortiz parehong miabuno’g 13 puntos aron tabangan ang ilang koponan nga mokulit og 2-1 nga baraha.
Ang Wildkittens nga nagtangag og 1-4 nga baraha gipangulohan ni Jasper Berezo, kinsa mibahog og 21 puntos, gisundan ni Mario Abinuman sa iyang 18 puntos ug Kirk Suson nga adunay 11 puntos.
Sa laing bahin, walay duwa sa CESAFI karong adlawa tungod gamiton ang Cebu Coliseum alang sa usa ka political assembly.
Ang gitakda unta nga mga duwa karong adlawa himuon karong Agosto 31. (BANAT NEWS)
- Latest
