Dynamic power milansang OG 5-0 sa SHAABAA caging
CEBU, Philippines - Ang Dynamic Power mikulit sa ikalimang sunod-sunod nga daog human ilang gipilde ang Autolab, 52-43 sa 20th SHAABAA Cup niadtong Miyerkules sa gabii didto sa SHS old campus sa Gen. Maxilom avenue, ning dakbayan.
Si Rodrick Mangubat mipabuto’g 20 puntos alang sa Dynamic Power nga nagbitbit na karon og 5-0 record, samtang si Carlo Villarica mao sab ang nangu sa Autolab sa iyang 19 puntos, si Terrence Go miamot og 12 puntos.
Sa laing mga duwa sa Division B, ang RDAK Transporters mipukan sa White Gold Club, 58-48, samtang ang Caltex Delo mipilde sa Filmon Finishing Studio, 52-41.
Sila si Cecilio ‘Boylit’ Gillamac III ug Jose Rey Reoma miratsada’g 11 puntos matag usa alang sa 4-1 nga RDAK Transporters. Gipangulohan sab ni Romeo Alejandro ang White Gold Club pinaagi sa iyang 21 puntos.
Sa laing bahin, ang Caltex Delo midaog batok sa Filmon Finishing Studio, 52-41. Si Ched Canares maoy nangu sa Caltex Delo sa iyang 13 puntos, gisundan ni Chris Aldeguer nga adunay 11 puntos, samtang si Erickson Arienza miposa og 17 puntos aron pangulohan ang Filmon Finishing Studio.
Sa Division A, ang Cebu Landmasters midaog sab batok sa Filmon Prince Medallion, samtang ang Bayfront Hotel Cebu milubong sa Gaisano Capital, 64-51.
Si Kyle Valmoria mihipos og 18 puntos, samtang sila si Jessieneth Wahing ug Daryle Tan midugang og 14 puntos matag usa alang sa Cebu Landmasters.
Ang Filmon Prince Medallion gipangulohan ni Jonathan Cimafranca sa iyang 33 puntos. (BANAT PALARO)
- Latest
