Canoy mobawos ni Tomogdan

CEBU, Philippines - Panimalos maoy tuyo sa Mandauehanon nga si Joey Canoy sa dihang iyang sangkaon si Jerry Tomogdan sa Valencia City, Bukidnon sa usa ka dumot nga ‘rematch’ alang sa Asian Boxing Federation minimumweight title  sa main event sa ‘Binakbakay sa Punta Princesa’ karong Domingo sa gabii diha sa Atillo Gym sa Brgy. Punta, Princesa, dakbayan sa Sugbo.

Miaway na karon isip Canoy J. Singwangcha, si Canoy (9-1-1,

3KOs) nakatilaw sa labing unang pilde sa iyang karera pinaagi sa majority

decision sa mga kamot ni Tomogdan (17-6-3,9Kos) niadtong Enero 21 didto sa

Barangay Tablon Gymnasium sa Cagayan de Oro City.

Nakabangon hinuon dayon si Canoy sa maong kapildihan pinaagi

sa pagbuntog ni Jonathan Ricablanca sa katapusan niyang away niadtong

Hunyo 12 didto sa La Proa Ballroom sa L’ Fisher Hotel  sa Bacolod City.

Sa iyang bahin, si Tomogdan miaway alang sa WBC minimumweight

title, apan napakyas kini human gipalukapa sa ikasiyam nga hugna ni Thai

champion Wanheng Manayothin duha pa ka bulan ang milabay didto sa

Bangkok, Thailand.

Sa supporting main event sa maong eksplosibong promosyon nga

gipasiugdahan ni Thai boxing patron Naris Singwangcha ug Cebuano

topnotch promoter Rex ‘Wakee’ Salud, ang wala pa’y pildeng lightweight

contender nga si Ardie Boyose Singwangcha (15-0-2,11KOs) makigsinukliay

og kinumo ni Phil Angcamor (13-23-3,7KOs) sa Bukidnon.

Lain pang nakalinya nga kumbati sa maong kulbahinam nga

fightcard nga gipaluyohan sa Punta Princesa Barangay Council ubos sa

liderato ni Brgy. Capt. Jose F. Navarro naglangkob nilang Joaquino E.

Singwangcha  batok  Charlie Cabilla, Dignos M. Singwangcha batok Ponciano

Rimandiman ug Junriel Jimenes batok Roga Libres.  (BANAT NEWS)