Power Forty duwa finals sa Saint Augustine Cup

CEBU, Philippines – Ang Power Forty squad nga gibitoonan sa mga piniling basketbolista sa maong ballclub mipilde sa YBAC, 101-93 aron moabante sa finals sa Saint Augustine Cup 2015 Inter-ballclub basketball tournament niadtong Lunes sa gabii didto sa Inayawan Sports Complex.

Ubos sa giya ni coach Michael Arias ug uban sakop sa coaching staff nga sila si Edwin Dejacto Sr., Dome Ozon ug Efren Mosqueda, ang Power Forty miratsada dayon pagsugod hinungdan nga sayo sab nilang gidominar ang duwa hangtod nga kini nahuman.

Ang Power Forty abante lang og sayes puntos sa first period, 22-16, apan nadoble ang ilang labaw sa halftime, 52-40 ubos sa liderato nilang  Robert Abasolo ug Rikboy Nacario.

Si Abasolo mipugnit og 28 puntos, samtang si Nacario mikamada’g 25 puntos alang sa Power Forty nga moduwa sa kampiyonato batok sa FASIBA, kinsa miabante sab sa finals human gipilde ang NIBA.

Ang batan-ong YBAC gipangulohan ni Axel Rabaya, kinsa mikadlit og 25 puntos, gisundan ni Boy Capitay sa iyang 22 puntos. Si Dopre Reyes miabuno’g 20 puntos, samtang si Aying Navares mitikdol og 14 puntos, apan wala kapusli ang ilang mga puntos kay igo na lang sila nga moduwa   alang sa ikatulong puwesto batok sa NIBA.

Ang Power Forty hugot nga gipaluyohan sa ilang presidente nga si Lando Almojallas ug sa mga team managers sa maong ballclub nga naglangkob nilang Atty. Flor Yosores sa HLY, Vez Eleguin sa Water Market, Romy Rama sa Park ‘N Go, Bob Samson ug Chino Kalinga sa Bob & Chino ug ingon man ni Fred Tantoy, usa sa mga tag-iya sa Water Market.

Ang torneyo gidumala ni league commissioner ug barangay councilor Insik Tibay inabagan ni Kenneth Montaña isip technical committee.

Kabahin kini sa mga kalihukan alang sa tinuig nga kapistahan sa ilang mahal nga patron Saint Augustine karong Agosto 29.

Puntos Matag Usa

POWER FORTY (101) – Abasolo 28, Nacario 25, Mercado 8, Ortega 8, Abarquez 7, Cabrera 6, Tantiado 6, Sumargo 4, Capala 4, Dequit 3, Misa 2.

YBAC (93) – Rabaya 25, Catipay 22, Reyes 20, Navares 14, Tabar 5, Singson 3, Lim 3, Villareal 1. (BANAT NEWS)