TCC Niños midominar sa Silliman swimfest
CEBU, Philippines – Ang Team Cebu City Niños nga gitimon sa Cebu Blue Marlins (CBM) milampos paglangkat sa kampiyonato sa Silliman University Founder’s Day Novice and Advance Age Bond Swimfest sa miaging weekend didto sa dakbayan sa Dumaguete.
Nangu sa mabungahon nga kampanya sa TCC mao si Rafael John Dacladal, kinsa mihakot og unom ka bulawang medalya ug ingon man sila si Michael Ichiro Kong sa University of Cebu ug Quintin Zee Sabalande sa Don Bosco Technology Center nga milabnot og tagilma ka bulawan.
Daku sab og naambag si Mike Gabrielle de la Serna sa Tabunok Central School nga mikabkab og upat ka bulawan, si Van Andy Chiua nga mibira og tulo ka golds ug si Blue Villarete sa Sacred Heart School-Ateneo de Cebu nga dunay duha ka golds.
Lain pang naka-gold medals sa boys division mao sila si Benedict James Orio sa Sage Prep School ug Martin Samuel del Rosario sa Blessed Trinity Academy.
Sa girls category, misalida og maayo si Zurielle Kenzie Galo sa UC nga dunay tulo ka golds ug susamang gidaghanon sa silver ug ingon man si Kristy Carmel Pardo, samtang sila si Bencynth Ghail Luage, Mai Kawabata, Micah Marie de la Serna ug Karen Mae Indaya nakabira og tagutlo ka golds.
Naka-gold sab silang Jo Arriena Cabanes sa St. Theresa’s College, Isabella Marie Deihl sa Bright Academy, Justin Reign Garrido, Mary Pauline Indaya sa Labangon Elementary School, Dionifel Kate Saraga ug Dionifel Ann Saraga sa Cebu City Central School ug Reesee Kursten Maree Navarro sa Bulacao. (BANAT NEWS)
- Latest
