Justice League Run sa Cebu
CEBU, Philippines - Talagsaon ug lahi kaayo nga lumba sa dagan ang masinati kun itandi sa naandan pinaagi sa pagpahigayon sa Justice League Run karong Septiyembre 26 diha sa SM City Cebu.
Seguradong malingaw gyud ang mga partisipante gumikan kay sila modagan samtang nagsul-ot og costume sa paborito nilang superhero sama nilang Batman, Superman, The Flash, Green Lantern ug Wonder Woman, alang sa mga babayeng runners.
“This will be another milestone for us Filipinos,” matud pa ni Marites Fragante sa Global Procurement, Inc. (GPI), ang lead organizer sa maong event atol sa pormal nga paglusad niini kagahapon didto sa Shakey’s Restaurant sa SM.
Ang rehistrasyon nagkantidad og P600 sa 3K, P700 sa 5K, ug P800 sa 10K, apan sulit kaayo kini gumikan kay makadawat man sila og premium race kit nga naglangkob og singlet nga ilang gusto nga adunay second piece costume (maskara sa Batman, Green Lantern ug The Flash, kapa sa Superman ug head piece sa Wonder Woman), sling bag ug race bib nga adunay timing chip.
Ang tanan nga motapos sa fun run makadawat sab og limited edition nga medalya nga adunay orihinal nga logo sa Justice League.
Si Fragante miingon nga dili momenus sa 4,000 ka runners ang ilang gipaabot nga mosalmot sa labing unang JL Run dinhi sa Sugbo.
Kadtong gusto moapil mahimong magparehistro online pinaagi sa zalora.com.ph sugod karong Agosto 18.
Modawat sab og walk-in registration sa Chris Sports outlets sa SM Radisson, Ayala ug Cebu I.T. Park, ug ingon man sa Island Souvenirs shops.
Alang sa dugang detalye, mahimong mobisita sa
www.dcjusticeleaguerun.com.ph. (BANAT PALARO)
- Latest
