P10T nga ganti sa CEPCA August chessfest
CEBU, Philippines – Mokabat ngadto sa P10,000 ang iapud-apud ngadto sa mga mananaog sa August edition sa Cebu Executives and Professionals Chess Association (CEPCA) monthly tournament karong Domingo diha sa Handuraw Pizza sa Gorordo Avenue, dakbayan sa Sugbo.
Ang kampiyon sa Group A mobulsa og P2,000, samtang ang motapos sa ikaduha makadawat og P1,500 ug ikatulo makaangkon og P1,000.
Sa Group B, ang top three makadawat og P1,500, P1,000 ug P800 matag usa. Ang mopahiluna sa ikaupat makaangkon og P700, samtang ang mokapyot sa ikalima mobulsa’g P500.
Ang top kiddie ug female players modawat og dugang ganti nga P500 matag usa.
Gawas sa ganting salapi, ang manghawod matag grupo moabante ngadto sa grand finals nga gitawag sab og “Battle of Champions” nga gikatakda karong Disyembre diha sa Lola Saling’s Seafood Grill and Restaurant sa barangay Casuntingan, dakbayan sa Mandaue.
Kadtong ni-qualify na alang sa grandfinals mao silang Rey Flores, NM Arnold Cadiz, Peterson Sia, Rosendo Yamyamin, Tony Cabibil, Jimmy Ty Jr. ug Carlo Maraat sa Group A ug Regelito Hortelano, Ruel Hortelano, Jun Kidlat, Elmer Odango, Jojo Paredes, Romy Pialan ug Edwin Cablao sa Group B.
Ang August edition sa CEPCA monthly gipaluyohan ni Susan Itaas, ang una ug bugtong Cebuana Woman National Master. Usa ka Cepcan, tulo ka higayon nga nahimo siyang miyembro sa Philippine Team nga mikumbati sa World Chess Olympiad.
Bisan og atua na siya nagbasi sa New York, USA, si Itaas aktibo gihapon nga nagsuporta sa Cebu chess ilabi na sa mga kalihukan kansang tuyo ug tumong mao ang pagpalambo ug pag-ugmad sa maong matang sa paugnat sa kusog niining dapita sa nasud. (BANAT NEWS)
- Latest
