Binukbokay sa minglanilla karong gabii

CEBU, Philippines - Ang Sugbuanong boksidor   nga si Junny Salogaol modepensa na sa iyang Philippine Boxing Federation (PBF) bantamweight title  batok ni Nicong Calamba sa Agusan del Norte sa main event sa “Binukbokay sa Minglanilla: War of the Fists”  karong gabii didto sa Minglanilla Sports Complex.

Kini ang ikaduhang pagdepensa ni Salogaol sa iyang PBF crown nga iyang nadaog human gipilde pinaagi sa third-round knockout si Julius Alcos niadtong Disyembre 7 sa miaging tuig didto sa Guadalupe Sports Complex,  Cebu City.

Sa una niyang pagdepensa, ang garbo sa Borbon, Cebu  nga si Salogaol, 21-anyos, nidaog pinaagi sa second round technical decision batok ni  Jilo Merlin niadtong Pebrero didto sa Dalaguete Sports Center, Cebu.

Sa supporting main event, si  Jerry Castroverde sa Omega Stable makigsangka batok ni Ryan Quimbo sa Compostela, Cebu sa walo ka hugna nga binukbukay.

Laing tulo ka Omega Stable boxers ang mopakita sab sa ilang abilidad sa undercard. Sila mao si featherweight Jerry Castroverde, flyweight RR Borbon ug super bantamweight Jay Aliasot.

Si Castroverde makigsangka ni Ryan Quimbo sa Compostela, si Borbon moharong ni Jomar Ceneta sa Bohol, samtang si Aliasot makigbatok sa taga Bohol nga si Ritchneil Rosales.

Mopakita sab sa iyang abilidad si Clyde Azarcon sa Bid Yellow Stable diin iyang sangkaon si Macmac Baribar sa Bohol sa upat ka hugna nilang sangka ubos sa minimumweight division.

Ang maong boxing promotion nga usa ka fund-raising campaign sa Barangay Councilors League of the Philippines-Minglanilla Chapter ubos sa ilang presidente nga si Joerick Bargayo.

Ang maong boxing promotion nga  giulohan og “Mayor Lani Pena Cup 2015”,  gipasiugdahan sa promoter nga si Lorenzo ‘Chao’ Sy isip usa sa mga kalihukan sa ika-158 nga  kapistahan sa   mahal nga patrona sa Minglanilla,  Immaculate Heart of Mary sa Agosto 22.