Dragons misungag sa baby panthers
CEBU, Philippines - Gisubhan og daog ang Cebu Eastern College Dragons pinaagi sa pagpilde sa University of Southern Philippines Foundation Baby Panthers, 59-43 sa usa ka low-scoring apan pisikal nga duwa sa juniors division sa 15th Cebu Schools Athletic Foundation, Inc. (CESAFI) basketball tournament kagabii didto sa Cebu Coliseum.
Kanunay naglabaw ang Dragons, kinsa miposte sa labing daku nilang bentaha nga 21 puntos, 51-30 pagsugod sa fourth period nga nakapasamot sa kainit sa duwa.
Gitawgan og unsportsmanlike foul silang Ain Obenza ug John Vincent Galarse hinungdan gitawag ni CESAFI commissioner Felix O. Tiukinhoy, Jr, ang duha ka coaches aron badlungon ang hugaw nga duwa sa ilang mga players.
Katapusang nakahimo’g unsportsmanlike foul mao si Jefferson Andrew Dy sa Dragons sa nahibiling 1:38 oras sa duwa diin naglabaw sila sa iskor nga 55-38.
Ang Dragons nagtangag karon og 1-0 nga baraha, samtang ang Baby Panthers nagkitkit og 0-2 record.
Gikan sa 21 puntos nga biya mihulga ang Baby Panthers, apan wala sila makalahutay.
Si James Mark Roa maoy nangu sa Dragons sa iyang 21 puntos, samtang si Ronald Ybañez mao sab ang nangu sa Baby Panthers sa iyang 10 puntos. (BANAT PALARO)
- Latest
