Parmis mibalik lantaw sa panag-uban nilang Poligrates

CEBU, Philippines – Human ilang gilangkat ang kampiyonato sa 8th Emil’s Fresh Chicken Fiesta Cup ubos sa Team Samsam Gullas lima pa lamang ka adlaw ang milabay didto sa Minglanilla, dili kapugngan ni coach Van Halen Parmis nga handumon ang dugay na nilang panag-uban sa alas niyang player nga si Eliud Poligrates ilabi na kay ang  ilang panaghigala milapas na sa hawanan sa korte paglabay sa mga katuigan.

Dili tiaw ang ilang pinagsamahan sud sa walo ka tuig nga nagbunga na og pipila ka kampiyonato. Misamot pa gyud katam-is ang ilang kalampusan sa Emil’s Cup gumikan kay si Poligrates maoy nahimong bida atol sa ilang duwa sa finals batok sa Abrenica Engineering. Si Ferdinand Lusdoc man tuod maoy nangu sa pagkulit og 32 puntos, apan ang duha ka sunod-sunod nga crucial 3-pointers ni Poligrates maoy nakasalbar sa Samsam Gullas team.

Mao kadto ang ika-41 nilang korona sukad nga silang Parmis ug Poligrates nagsugod og apil og mga torneyo sa nagkadaiyang dapit sa Kabisay-an ug Mindanao sukad pa niadtong tuig 2007.

“Makadaghan na kaayo mi nga nakadaog og championship, 41 na sa kinatibuk-an, apan kini ang dili nako mahikalimtan kay mao kini ang labing unang higayon nga miapil mi og tournament diri sa Cebu ug midaog dayon mi,” matud pa ni Parmis.

Si Parmis mihakot na og kapin sa 80 ka mga titulo sa iyang karera isip commercial coach, butang nga nahimo niyang pultahan aron makasud sa Cebu collegiate basketball isip assistant coach sa University of the Visayas (UV) Green Lancers. Kining tanan iyang nakab-ot gumikan sa abag ni Poligrates.

Matud pa ni Parmis nga kun siya maoy giila nga ‘Phil Jackson of Cebu’, duna sab siya’y ‘Michael Jordan’ nga si Poligrates.

“Mapasalamaton kaayo ko ni Poligrates gumikan kay kun unsa ang akong nakab-ot, kabahin siya niini,” dason pa ni Parmis.

Sa iyang bahin, si Poligrates, nga beterano sa PBA ubos sa upat ka teams (Talk ‘N Talk, NLEX, Air 21, ug KIA), napuno sab og mga pulong sa pagdayeg alang ni Parmis, nga giila niya dili lamang usa ka magtutudlo, apan usa sab ka igsoon.

“Ang ganahan kaayo nako ni coach mao nga iyang pagkamapaubsanon. Humble kaayo siya nga pagka tawo. Isip coach, disciplinarian na siya pero nindot kaayo mo-motivate og player. Pareho ang iyang pagtan-aw namong mga players mao nang amo siyang gitamod ug taas kaayo ang among respeto niya. Ang laing nakanindot kay pilde man o daog, amo ning dawaton isip usa ka team kay mao mana ang iyang prinsipyo,” batbat pa sa garbo sa Poro, isla sa Camotes. (BANAT NEWS)