Magis Eagles sugod sa ilang title retention bid

CEBU, Philippines – Sugdan karon  sa defending champion Sacred Heart School-Ateneo de Cebu Magis Eagles  ang  ilang  title-retention bid dihang makigsangka sila batok sa University of Southern Philippines Foundation Baby Panthers  sa 15th  Cebu Schools Athletic Foundation, Inc. (CESAFI) karong alas-5:15 sa hapon diha sa Cebu Coliseum.

Bisan tuod  og dili makaduwa  ang batan-on apan kasaligan nga si Joshua Sinclair tungod sa edad, mas paborito lang gihapon ang Magis Eagles nga modaog batok sa Baby Panthers. Nawad-an sab hinuon og mga pambatong players ang Magis Eagles nga sakop sa team nga midaog sa titulo sa miaging tuig  batok sa University of the Visayas Baby Lancers sa finals sama  nilang Felixberto ‘Janjan’ Jaboneta ug Jose Piero Longa nga tua na karon sa University of the Philippines ug si Joseph Mayol nga tua  karon sa UC.

Apan nagpasalamat ang Magis Eagles nga naa gihapon uban kanila silang Alex Roeland Visser, Travis Jelour Mantua ug Andrew Vincent Velasco nga maoy mangu sa opensa sa Magis Eagles ni coach Rommel Rasmo.

Ang Baby Panthers ni coach Joph Cleofas   mosalig sa ilang high-leaper nga si Dennis Archival ug sa ilang beteranong mga guwardiya.

Sa laing bahin, ang Universty of Cebu Webmasters mosuway pagrekober sa ilang kapildihan sa dihang ilang sangkaon ang USPF Panthers sa alas-6:45 sa gabii.  Ang Webmasters, usa sa lima ka teams nga walay import  nagsalig lang sa ilang outside shooting nga maoy  labing hait nilang hinagiban.

Usa na niini si Melvin Butohan. Andam sab mosuporta silang Garciano Puerto, Earl Montilla, Justine Dacalos, Wendell Santander ug Clint Suelto.

Ang Panthers, makasalig  nilang Branford Borces, Jawen Ceniza, Roy Quiachon ug point guard Mike Patalinghug. (BANAT NEWS)