Undaloc, Betonio naghari sa 105K ultra race
CEBU, Philippines - Usa ka sundalo nga lumad gikan sa dakbayan sa Toledo nga si Virgilio Undaloc Jr. ug ang bisitang ultra-runner sa Surigao nga si Rose Betonio maoy nanghawod sa 2015 TransCebu Ultramathon, usa ka makutas nga lumba sa dagan nga adunay distansiya nga 105 ka kilometro sugod didto sa Naga City Hall ug natapos sa Hilltop Hotel diha sa Brgy. Lahug, dakbayan sa Sugbo.
Ang 30-anyos nga si Undaloc maoy unang milabang sa finish line sud sa 12 ka oras, 18 minutos ug 32 segundos. Ang makapakurat kay paspas siya og usa lamang ka segundo batok ni Rodrigo Busala, nga maoy nitapos sa ikaduhang dapit sa oras nga 12:18:33.
Si Ong Soon Seng nalandig sa ikatulong puwesto sa oras nga 12:48:07, samtang sila si Richard Quimque ug Paul Drossou maoy mikapyot sa ikaupat ug ikalimang dapit sa oras nga 14:51:10 ug 15:09:18.
Nagkumpleto sa top 10 sa men’s open division mao sila si Dylan Marshall (15:37:14), David Wong (15:37:52), Adones Baterna (15:40:25), Erwin Alea (15:41:28) ug John Villanueva (15:41:33).
Sa women’s open, ang 32-anyos nga si Betonio maoy gikoronahang hara. Mitapos siya isip 15th overall sa 134 ka mga entrante bitbit ang oras nga 15:58:12. Mipahiluna sa ikaduhang dapit mao si Wai Teng Lew sa oras nga 17:13:27, gisundan ni Rusinah Soligi sa oras nga 18:04:31.
Naglangkob sa top 10 mao sila si Cherry Rose Otero (18:14:34), Linda Poong (18:23:05), Yi Lian Pang (18:39:06), Irene Oliveros (19:26:30.43), Kathryn Kuan (21:03:52), Karin Holzschuher (21:19:53) ug Mila Algabre (22:25:38). (BANAT NEWS)
- Latest
