15th CESAFI gilusad na
CEBU, Philippines - Pormal nga gilusad ang ika-15 nga season sa Cebu Schools Athletic Foundation, Inc. (CESAFI) atol sa usa ka press conference kagahapon didto sa Parklane International Hotel.
Atol sa maong press conference, pormal sab nga gihimo ang ilang partnership deal nga mihimo sa VIVA Production sa IBC-13 isip official television partner sa CESAFI. Gisaksihan kini ni CESAFI President Fr. Manny Uy, SJ, commissioner Felix O. Tiukinhoy Jr., Vincent del Rosario ug Ronnie Nathanielsz sa Viva Sports ug IBC 13 General Manager Lito Cruz.
Isip kabahin sa ilang kasabotan, ang VIVA Sports mohimo og regular coverage sa main game matag adlaw sa duwa ug duha ka duwa matag Domingo nga isalida lukop nasud sa prime time pinaagi sa IBC 13 pagka sunod adlaw.
Ang CESAFI 15th season buksan karong Sabado diha sa Cebu Coliseum.
Magsangka sa opening day mao ang University of Cebu (UC) Webmasters batok sa University of San Jose-Recoletos (USJ-R) Jaguars sa collegiate ug secondary teams.
Sa laing bahin, duna gyu’y manubag ug silotan og “lifetime ban” kun mapamatud-an nga sad-an ang coach nga nalambigit sa ‘falsification of records’ sa mga players sa high school team sa Southwestern University (SWU), sumala pa Tiukinhoy.
Wala hinuon ibutyag ni Tiukinhoy ang ngan sa coach nga maoy hinungdan nganong wala dawata ang SWU Baby Cobras kay padayon pa ang ilang imbistigasyon ngadto sa mga magduduwa.
Sa ilang board meeting sa miaging gabii uban sa mga team owners ug presidents, si Tiukinhoy nagkanayon nga ilang nahukman nga pahamtangan og “lifetime ban” ang coach inay lima lang ka tuig nga ban. (BANAT NEWS)
- Latest
