IronKids, triathlon expo mobida sa Cobra Ironman

CEBU, Philippines – Ang Alaska IronKids ug ang world-class triathlon expo maoy modugang sa kasadya sa giatngan nga Cobra Ironman 70.3 Philippines karong Domingo diha sa Shangri-La’s Mactan Resort and Spa sa dakbayan sa Lapu-Lapu.

Miabot ngadto sa 169 ka mga batan-ong triathletes ang moladlad sa ilang abilidad sa IronKids, ang junior version sa Ironman Philippines, karong Agosto 1.

Anaa na sa ikalima niining edisyon sa nasud, pipila ka mga age groups ang kumbatihan sa Alaska IronKids gikan sa sayes hangtod sa 14-anyos.

Usa ka adlaw sa dili pa ang lumba, adunay ipahigayon nga 2.5-kilometer Alaska IronKids Run Out ngadto sa Punta Engaño Elementary School sugod sa alas-6 sa buntag.

Ang mga partisipante sa IronKids uban nilang Ironman champions Pete Jacobs, Caroline Steffen, ug Alaska Tri-Aspire Team coach Matt O’Halloran ug ang mga Pinoy’ng elite nga sila si Banjo Norte ug Jenny Guerrero ang moapil sa maong kalihukan didto sa Punta Engaño ES diin sila makig-uban sa lain pang 1,600 ka mga bata alang sa Alaska for Breakfast campaign.

Gawas sa IronKids, ang mga entrante ug   ingon man ang mga bisita makasinati og  world-class Triathlon Expo nga maoy labing daku sa Asia-Pacific gumikan sa 36 niini ka mga exhibitors.

Samtang sa gikahinaman nga Ironnan, miabot na ngadto sa 2,616 ka mga partisipante gikan sa 52 ka nasud sa unom ka  kontinente ang mopakita’g aksiyon sa makutas nga lumba nga naglangkob og 1.9 ka kilometro nga langoy, 90 kilometro nga biseklita ug 21 ka kilometro nga dagan.

Lawom sab nga linyada sa dekalibreng pro triathletes ang mokumbati.

Ang makalisang nga Pro lineup naglangkob og duha ka world champions nga sila si Craig ‘Crowie’ Alexander ug Pete ‘PJ’ Jacobs. Mobalik sab ang kampiyon sa miaging tuig nga sila si Brent McMahon ug Caroline Steffen aron manalipod sa ilang korona.

Gipaabot nga mag-atubang sila og lisud nga hagit sa tadhan nga mga kaatbang sama nilang Cameron Brown, Luke McKenzie, Tim Reed, Sam Betten, Belinda Granger, Bree Wee, Beth Gerdes, Dimity Lee-Duke, Tim Van Berkel, Justin Granger, Clayton Fettell, Michael Murphy, Nick Baldwin, Carole Fuchs, Kathryn Haesner, Stef Puszka, Michelle Wu ug Derek Cross.

Ang maong gikahinaman nga kompetisyon usa sab ka qualifying race diin 40 ka luna sa nagkadaiyang age-groups ang maangkon sa mga entrante alang sa 2016 Ironman 70.3 World Championships didto sa Sunshine Coast, Australia. (BANAT NEWS)