Warriors maoy kampiyon

CEBU, Philippines – Gipruweba sa University of San Carlos Warriors nga usa sila ka championship caliber team.

Nagkumboya og 10 ka three-pointer silang Nico Magat ug Victor Rabat diin ilang gipakita ang labing init nilang field shooting aron pangulohan ang Warriors ngadto sa impresibong 71-59 nga kadaogan batok sa University of the Visayas Green Lancers ug misakmit sa titulo sa Bogo City Mayor's Cup CESAFI Pre-Season basketball tournament kaniadtong Sabado sa gabii didto sa Celestino E. Martinez, Jr. Coliseum sa dakbayan sa Bogo.

Gikan sa ilang ngil-ad nga pagsugod diin sayo silang nabiyaan, 1-11, misukli og 11-0 run ang Warriors ug dali kaayo silang  nakasakmit sa liderato, 12-11 ug pinaagi sa duha ka triples ni Rabat sa first period, gitapos sa Warriors ang maong period sa 16-13 nga bentaha.

Gikan didto, wala na molugak ang Warriors ug nagpadayon ang ilang kainit sa mga tirada sa gawas ug mitabang pa gyud pagdominar sa undergoal ang import nga si Shooster Olago ug ang kugihan nga bigman nga si Charles Pepito nga wala motugot nga malupigan sila sa import sa Lancers nga si Steve Cedrick Akomo.

Wala'y nakapiog sa init nga kamot sa Warriors kinsa milabaw og labing menos 21 puntos human sa ika-upat ug kataposang three-pointer ni Rabat, 69-48 may kapin dos minutos ang nahibiling oras sa duwa.

Si Magat kinsa maoy napiling MVP, maoy nangu sa Warriors sa iyang 19 puntos samtang sila si Rabat ug Olago parehong midugang og 16 puntos matag usa ug may 12 puntos si Pepito.

Si Olago maoy nakadawat sa Sporstmanship award ug mibulsa sa tres mil pesos isip bonus gikan ni Bogo City Junnie Martinez samtang mas dako sa nadawat ni Magat nga usa ka libo ka pesos. 

Si Joshue Segumpan ug si Akomo maoy nangu sa opensa sa Lancers sa ilang 11 ug 10 puntos, matag usa. Mao lang kadto'y bugtong pilde sa Lancers kinsa midaog batok sa Warriors niadtong Hulyo 11 atol sa opening game sa iskor, 71-64.

Wala mag-igo sa gawas ang Lancers ang ilang outside shooters nga naglakip kanilang Francisco Arong, Rey Suerte, Alfred Codilla ug Monic Soliva ug pakyas ang ilang mga bigmen nga silang Akomo, Leonard Santillan, Rhaffy Octobre, Arvie Cabanero ug Alwyn Aguirre sa pagpugong sa ilawom diin nailhan unta ang Lancers nga usa sa labing maayong team sa open court.

Sa sayo pa, midaog ang University of San Jose Recoletos Jaguars batok sa University of Cebu Webmasters, 76-57 alang sa sangka sa ikatulong pwesto.

Upat ka Jaguars ang mibahug og double figures diin parehong mihimo og 16 puntos matag usa silang Kevin Villafranca ug Mark Labares.

Si Melvin Botuhan maoy nangu sa Webmasters sa iyang 12 puntos ug miamot silang Graciano Puerto ug John Jabello og 10 puntos matag usa.

Ang Warriors ni coach Britt Reroma midaog og 80 mil pesos isip kampiyon samtang nakabitbit og 60 mil pesos ang Lancers. May dugang singko mil pesos nga bonus ngadto sa Warriors coaching staff isip kampiyon.     

Ang Jaguars nakadawat og 40 mil pesos samtang may 20 mil pesos ang Webmasters. Ang ikalimang team nga misalmot nga mao ang University of Southern Philippines Foundation Panthers nakadawat sab og consolation prize apan wala ibutyag kung pila kini.  

May kinatibuk-ang 210  mil pesos ang premyo sa maong torneyo wala pay labot sa tag singko mil pesos nga transportation allowance sa matag team sa ilang playing date.

Puntos matag usa:

First Game:

USJR (76) – Villafranca 16, Labares 16, Dinolan 13, Peromingan 10, Resma 6, Mnatilla 4, Paon 3, Bayhonan 3, Gastador 2, Olmilla 2, Moral 1.

UC (57) – Botuhan 12, Puerto 10, Jabello 10, Dacalos 5, Culango 4, Montilla 3, Santander 3, Dumat-ol 3, Codilla 2, Igloria 2. Halftime: 33-34.

Second Game:

USC (71) – Magat 19, Rabat 16, Olago 16, Pepito 12, Ortega 4, McAloney 4, Suarez 1.

UV (59) – Segumpan 11, Akomo 10, Manzo 6, Arong 6, Santillan 6, Cabanero 6, Aguirre 5, Suerte 3, Codilla 1. Halftime: 37-27.  (BANAT NEWS)