Stay Clean, Fusion ‘twice-to-beat’ sa A+EBA semiFINALS

CEBU, Philippines - Ang Stay Clean ug Fusion mikulit og managlahing kadaugan aron pag-angkon sa nag-unang duha ka luna ngadto sa crossover semifinals sa Architects+Engineers Basketball Association's 1st Davies Paints Cup didto sa Cebu Eastern College gym.

Samtang ang Stay Clean munasginhawang mipukan sa Acreex sa iskor nga 79-75, ang Fusion wala paningta bisan og usa lamang ka patak kay wala mobutho ang kontra nilang Elastogel atol sa ilang duwa.

Pulos nila gitapos ang duha ka hugna sa eliminasyon bitbit ang 7-3 win-loss records, apan ang Stay Clean maoy nahimong no. 1 qualifier gumikan sa simple tie.

Bisan pa man niini, ang Stay Clean ug Fusion pulos magabaton og ‘twice-to-beat’ advantage batok sa Acreex ug Polyfloor sa sunod nga bahin sa maong tulo ka bulan nga torneyo. Ang mananaog magsangka dayon sa kampiyonato sa usa ka best-of-three series. (BANAT NEWS)