Pito ka CEOS mobanat sa Cobra Ironman

CEBU, Philippines - Pito ka mga notadong pangan sa natad sa patigayon  dinhi ug gawas sa nasud ang mokumbati ubos sa CEO (Chief Executive Officer) division sa Cobra Ironman 70.3 Philippines karong Agosto 2 didto sa Shangri-La’s Mactan Resort and Spa, Lapu-Lapu City.

Mangu kanila mao ang Australyanong si Geoff Meyer, ang CEO sa Ironman Asia Pacific. Ang iyang presensiya seguradong makadugang og presyur sa mga organizers nga nagtinguha nga mo-bid aron mo-host sa Ironman Asia Pacific Championships sunod tuig.

Si Tom Navasero sa PHILAB Industries, Inc. mobalik usab aron depensaan ang iyang korona. Mohagit gihapon kaniya ang runner-up sa miaging tuig nga si David Charlton, ang tag-iya sa David’s Salon ug ingon man ang 2013 champion nga si Tyrone Tan, garbo sa mga Sugbuanon nga maoy nagduma sa Tyrone Property Realty and Development Corp.

Lain pang mga contenders sa maong eksklusibong kategoriya mao sila si Bryce Maddock sa TaskUs, usa ka US-based customer care ug back office support company, Engr. Francis Miguel sa AIM Global, Inc., usa ka multi-level networking company nga nagbasi dinhi sa nasud ug siyempre si Wilfred Steven Uytengsu sa Alaska Milk Corporation nga mao sab ang Presidente ug CEO sa Sunrise Events, Inc., ang nag-organisar sa maong lumba.

Sa kinatibuk-an, miabot ngadto sa 2,614 ka mga partisipante gikan sa 52 ka nasud ang mopakita’g aksiyon sa maong makutas nga karera nga naglangkob og 1.9 ka kilometro nga langoy, 90 kilometro nga bike ug 21 ka kilometro nga dagan. (BANAT NEWS)