Niños misakmit na sab og laing titulo sa 1st Sandugo Age-group Swimfest
CEBU, Philippines – Ang Cebu City Niños, nga gitimon sa Blue Marlins mipakli sa ikaduha niining sunod-sunod nga titulo human gidominar ang advanced category sa 1st Sandugo Age-group Swimfest didto sa Carlos P. Garcia Sports and Cultural Complex sa Tagbilaran City.
Si Van Andre Chiu sa Sacred Heart School-Ateneo de Cebu ug Shane Allyne Pareja sa University of Cebu mikabkab og unom ka gold medals aron pagsakmit sa most bemedalled swimmer awards.
Si Michael Ichiro Kong mao sab ang nanghawod sa iyang kategoriya human mihakot og lima ka golds ug usa ka bronze.
Si Jehaosh Reign Garrido sa Bright Academy parehong mikubkob og lima ka bulawang medalya, samtang sila si Quintin Zee Sabalande sa Don Bosco Technology Center ug Mike Gabriellse de la Serna ug Fritz Tamara sa Tabunok Central School mikuykoy og tag-upat ka bulawan. Lain pang mitunol og gold medals mao sila si Nick Enrico Micarsos ug Jeibi Oriesga.
Sa women’s division, 11 ka mga batos ni coach Rolando Alvarez ang misidlak sab nga gipangulohan nilang Romylin Nina Ignacio, Karen Mae Indaya, Zurielle Kenze Galo ug Isabella Marie Deihl nga midaog og upat ka bulawang medalya matag usa.
Si Mai Kawabata mipugnit og tulo ka golds ug usa ka bronze, samtang si Trina Cañeda nakapasol og duha ka golds ug upat ka silvers. Lain pang misakmit og bulawan mao sila si Bencynth Ghail Luage, Justine Reign Garrido ug Lindsay Ann Gonzales. (BANAT NEWS)
- Latest
