Power Forty cagefest 2015 sugdan karon

CEBU, Philippines – Puno sa aksiyon ang gilauman niining Martes Santo dihang magsugod na ang kalbaryo sa mga koponan nga mosalmot sa Power Forty Basketball Tournament 2015 nga buksan karong gabii diha sa Inayawan Sports Complex.

Unom ka teams ang mangahas pagsakmit sa kampiyonato nga naglakip sa HLY ni team owner Atty. Flor Yosores, Water Market ni Vez Eleguin, Park N; Go ni Romy Rama, Pardo Builders ni Lando Almojallas, Zebra Helmet ni Alan Lim ug ang Bob & Chino nilang Chino Kalinga ug Bob Samson.

Unang magsangka ang HLY ug Zebra Helmet sa alas-7 sa gabii, sundan kini sa engkuwentro tali sa Park N’ Go ug Water Market sa alas-8:30 ug dayon sa duwa tali sa Pardo Builders ug Bob & Chino.

Matud pa ni commissioner ug Cebu Schools Athletic Foundation Inc. (CESAFI) head referee Edwin Dejacto nga ang torneyo mosubay og double round robin sa elimination. Ang top two teams makakuha og luna sa semifinals.

Ang mahabiling upat ka teams magpinaksitay diin ang No. 3 makigsangka sa No. 5 ug ang No. 6 makigbatok sa No. 4. Ang modaog maoy makontra sa nag-unang duha ka koponan. Ang mga duwa himuon matag Martes sa gabii diha sa Inayawan Sports Complex. Sumala pa ni Dejacto nga ganting salapi ang madawat sa mga mananaog. Ang kampiyon mobulsa’g P5,000, ang first runner-up makadawat og P4,000 ug ang second runner-up makaangkon og P3,000 ug ang third runner-up mobitbit og P2,000. (BANAT NEWS)