Cebuano Jins misidlak sa Vietnam
CEBU, Philippines - Ang mga Sugbuanong jins mipamatuod nga angayan sila mamahimong miyembro sa Philippine team human mikabkab og pito ka gold, lima ka silver, ug duha ka bronze medals sa ASEAN Taekwondo Federation Championships dili pa dugay didto sa Saigon, Vietnam.
Si McAvyngyr Alob maoy unang mitunol og bulawan pinaagi sa poomsae team competition uban nilang Patrick Perez ug Adrian Ang. Ang 17-anyos nga si Alob, kinsa miduwa sa maong torneyo sa labing unang higayon, milabni sab og silver sa individual event.
Sa poomsae kon forms gihapon, si Aidaine Laxa mitunol og duha ka silvers ug usa ka bronze, samtang si Cheyena de la Fuente mibira og silver sa team event uban ni Laxa.
Ang mga Sugbuanon mipakita sab og maayong labok sa sparring competition diin sila mikabkab og unom ka bulawan kortesiya nilang Nica Garces, Denison Wilrej Cañeda, Zozen Prajes, Sal Luiji Estrada, Wendiljay Rama ug Anne Albarracin.
Si Mayn Coran mitunol og silver, samtang si Royda Jane Ranile midonar og bronze.
Human sa Vietnam, ang mga Sugbuanon adto na sab mopakita sa ilangabilidad sa 2015 Asian Junior Taekwondo Championships karong Abril 8-15 didto sa Taiwan. (BANAT NEWS)
- Latest
