Painters angkon sa twice-to-beat
CEBU, Philippines – Gisuyakan sa Rain or Shine Elasto Painters ang Kia Carnival, 119-99, aron masakiyo ang No.1 seed ug twice-to-beat advantage sa playoffs sa PBA Commissioner's Cup kagahapon didto sa Smart Araneta Coliseum.
Ang import nga si Wayne Chism mibomba og double-double 28 points ug 12 rebounds aron pangulohan ang Rain or Shine nga magbaton og dakung pabor sa quarterfinals diin sangkaon nila ang mas huyang unya nga eight seed.
Gikan sa 30-26 nga labaw human sa first period, ang Painters kalit lang miratsada diin mitukod sila og dakung labaw sa second quarter, 71-44.
Misuway og duol ang Carnival sa Painters atol sa final period, 88-96, apan kadto na ang katapusang higayun nga nakabuwelo sila human sila usbi og pauwan og puntos sa Rain or Shine.
Si PJ Ramos maoy nangulo sa Kia sa iyang 45 puntos. Ang Kia natagak sa 4-7 win-loss record ug mag-ampo sila nga mapilde ang ubang koponan aron mahayagan ilang tsansa sa playoffs.
- Latest
