Cebu mo-host sa Batang Pinoy National Finals

CEBU, Philippines - Gidawat sa Sugbo ang tahas isip host sa Philippine Youth Games-Batang Pinoy National Championships karong Nobiyembre 27 hangtod sa Disyembre 2 diha sa Cebu City Sports Center.

Ang Cebu City Sports Commission ubos sa liderato ni Edward Hayco misangon nga maoy mopadagan sa maong usa ka semanang torneyo gumikan kay ila mang nakita nga daghan kini og mahatag nga benepisyo ug kaayohan sa Sugbo.

Ang Batang Pinoy gitagana alang sa mga Pinoy’ng atleta nga nag-edad og 15-anyos ug paubos.  Nakalahi niini sa uban kay ang magbuot sa ipadalang teams mao ang mga local government unit ug kini puwedeng magrepresentar sa probinsiya, siyudad, munisipalidad o barangay. Laktod pagka sulti, ang usa ka atleta dili makasalmot kun wala kini accreditation sa usa ka LGU.

  Usa sa mga prebilihiyo isip host, ang Team Cebu City dili na mag-agi pa og qualifying round. Gawas niini, puwede sab sila mopadala og daghan nga mga entrante ug ingon man koponan kutob sa ilang makaya.

“It is a privilege given to the host. They no longer have to go through the qualifying. We can also accommodate more than one team for them provided that they will represent a specific barangay (or district of the city). We can work our way around on this,” matud pa ni Batang Pinoy project director Jay Alano atol sa panagtigum niini ni Hayco ug commissioner Bernard Ricablanca ning bag-o lang didto sa buhatan sa Philippine Sports Commission sa kaulohan.

Sama sa dakbayan, ang probinsya sa Sugbo dili na sab mag-agi pa og eliminasyon isip co-host. Apan kun mopadala sila og sobra sa usa ka team sa usa ka event, usa lamang ang direktang moabante sa national finals, samtang ang uban moagi una og qualifying round. Sa Visayas leg, ang eliminasyon gikatakda karong Septiyembre 21-26 didto sa Romblon.

Sa kinatibuk-an, 34 ka events ang kumbatihan sa Batang Pinoy. Kini naglangkob sa archery, arnis, athletics, badminton, baseball, basketball, beach volleyball, billiards, boxing, chess, cycling, dancesport, fencing, futsal, gymnastics, judo, karatedo, lawn tennis, Muay Thai, pencak silat, rugby football, sailing, shooting, soft tennis, softball, sepak takraw, swimming, table tennis, taekwondo, triathlon, volleyball, weightlifting, wrestling ug wushu.

Dunay tulo ka  demonstration sports nga mao ang handball, petangue, ug fin swimming.

Dili hinuon tanang events mahitabo sa Sugbo kay ang baseball, gymnastics, judo, sailing ug shooting adto man ipahigayon sa Bulacan apil na ang cheerleading contest. (BANAT NEWS)