No. 1 spot tuyo sa Purefoods

CEBU, Philippines – Pag-angkon sa unang dapit sa standing maoy  tinguha sa defending champion Purefoods Star Hotshots sa ilang pakigharong sa Barako Bull Energy Cola sa PBA Commissioner’s Cup karong adlawa didto sa Smart Araneta Coliseum.

Ang duwa sugdan sa alas-4 sa hapon.

Human makalingkawas sa triple overtime batok sa powerhouse  Talk N’ Text Tropang Texters niadtong Sabado didto sa Davao City, ang Purefoods seryoso nga modepensa sa ilang korona ug una nilang lakang  mao ang pagsakmit sa automatic semis berth.

Sa nagkaduol nga playoffs, ang Purefoods nagkupot og 6-3 win-loss record ug ang kadaugan karon motugpo kanila ngadto sa unang dapit sa standing.

Ang Purefoods magsandig gihapon sa ilang veteran ug kanhi ‘Best Import’ nga si Denzel Bowles, kinsa mirehistro og 30 puntos, 15 rebounds, unom ka assists ug upat ka blocks batok sa Talk N' Text.

Ang Purefoods maglaum sab sa suporta gikan sa mga lokal  sama nila ni James Yap, Joe DeVance, Mark Barroca ug Marc Pingris.

Sa ilang bahin, ang Barako Bull mopakgang sa  tulo ka sunod-sunod nilang pilde aron may paglaum pa sa playoffs.

Ang Barako nga nagtangag og 4-5 win-loss record magsalig ni ex-NBA cager ug import Solomon Alabi.

Sa main game, ang Meralco Bolts makigsangka sa Alaska Aces sa alas-7 sa gabii. (BANAT NEWS)