Torre, Barbosa may pag-asa pa

MANILA, Philippines – Pinatumba nina Grandmasters Eugene Torre at Oliver Barbosa ang kani-ka­nilang kalaban para makisosyo sa ikatlong puwesto sa eighth round ng Asian Zonals  3.3 Championship sa Ho Chi Minh, Vietnam kahapon.

Tinalo ng 65-anyos na si Torre si FIDE Master Le Tuan Minh sa marathon 95-move ng Bogo-Indian Defense.

Giniba naman ni Barbosa ang kababayang si GM Richard Bitoon sa 77 moves ng Trompovsky Opening para makisama sa four-way tie sa No. 3 sa magkakatulad na 5.5 points.

Ang mahalaga dito, nanatili sa kontensyon sina Torre at Barbosa para sa huling dalawang tiket sa World Cup na nakatakda sa Setyembre 10 hanggang Oktubre 4 sa Baku, Azerbaijan.