Bahay ni J. Lo sa L.A. kursunada ni Pacquiao
MANILA, Philippines – Malaki ang posibilidad na ang bahay na dating pag-aari ng superstar na si Jennifer Lopez ay mapunta kay Manny Pacquiao.
Kasama ang GMA-7, nilibot ni Pacquiao ang property ni J. Lo at agad nagustuhan dahil may malaking swimming pool bukod sa entertainment center at living room na puwedeng tumanggap ng maraming bisita.
Lumiban sa pagsasanay sa Wild Card Gym si Pacman noong Sabado para maghanap ng bahay at lupa na kanyang puwedeng bilhin lalo pa’t ang isa niyang ari-arian sa Larchmont Park ay ibinebenta niya.
Sinasabing nasa $12 milyon ang turing sa bahay ni Lopez at handa na umano si Pacquiao na magpalabas ng kanyang presyo matapos na personal na makita ito.
Kayang bumili ng Kongresista mula Sarangani Province ng magarbong tahanan dahil tinatayang hindi bababa sa $80 milyon ang kanyang kikitain sa pagharap kay pound-for-pound king Floyd Mayweather Jr. sa Mayo 2.
Hindi pa kasama rito ang kanyang parte sa tinatayang record-breaking sales sa Pay-Per-View kaya’t hindi nakakapagtaka kung pumalo sa $100 milyon ang kanyang maiuwi matapos ang mega-fight na bakbakan sa MGM Grand Arena sa Las Vegas. (AC)
- Latest
