Master Ekin gi-induct sa phl ‘hall-of fame’
CEBU, Philippines - Namunga ang paningkamot ug dedikasyon ni Yaw-Yan ArDigma Cebu CEO and Founder Master Benigno ‘Ekin’ R. Caniga Jr. sa natad sa martial arts kay usa siya sa mga inductee sa 3rd Philippine Martial Arts Hall-of-Fame didto sa Baguio City sa Abril 17.
Gipangulohan ni executive director Punong Lakan Garitony Nicolas, ang tinuig nga seremonyas mohatag og pasidungog ug pag-ila sa mga Pinoy martial arts teachers ug practitioners sa nasud ug sa uban pang bahin sa kalibotan.
Si Master Ekin usa lang sa tulo ka mga Sugbuanon nga nalakip sa top 10 sa Hall-of-Fame karong tuiga gikan sa kapin sa 30 nga gipilian.
“Nalipay ko ug nagpasalamat ko ani. Tungod ani mas na-inspire ko nga maningkamot pa alang sa paglambo sa martial arts ug pagbutang sa Cebu sa mapa sa mixed martial arts,” matud pa ni Master Ekin.
Nagsugod sa edad nga 11-anyos, si Master Ekin nahilig sa martial arts diin nakat-on siya og Yaw-Yan gikan mismo sa originator nga si Grandmaster Napoleon Fernandez.
Human siya mahimong sakop sa Philippine team niadtong sayong bahin sa dekada 90, si Master Ekin nahimong founder sa Yaw-Yan ArDigma dinhi sa Cebu diin ang iyang gym maoy nahimong labing unang MMA academy sa Sugbo.
Gawas sa Yaw-Yan Gym, milipang usab ang martial arts didto sa Los Angeles, Detroit, France ug United Kingdom.
Sa tuyo nga makakaplag og mga elite Cebuano fighters, si Caniga mipasiugda og mga kickboxing ug MMA tournaments. (BANAT PALARO)
- Latest
