HLY teams nagmadaugon
CEBU, Philippines – Aron mahimong mabulokon ang kasaulogan sa ikatulong anibersaryo sa Inayagan Basketball Legend (IBL), ang mga opisyales sa maong ballclub ubos sa liderato sa ilang presidente nga si Peter Lalican mipasiugda’g exhibition games ubos sa 50-above ug 40-above division niadtong Biyernes sa gabii diha sa Inayagan Sports Complex.
Ang HLY ug ang HLY Selection maoy nagmadaugon sa tagsa-tagsa nila ka duwa.
Sa pasiunang duwa, ang HLY midaog batok sa IBL Legend, 94-89 sa 50-above, samtang ang igsuon nilang koponan HLY Selection walay pupanagang milubong sa host Inayagan All-Star, 101-86 sa 40-above.
Upat ka HLY players ang miiskor og double figures nga gipangunahan ni Ramon Ceballos, kinsa mikadlit og 24 puntos, gisundan ni W. Cabrera. Sila si Michael Arias ug Teody Ebrado miabuno’g 12 ug 10 puntos matag usa.
Si Amik Rabaya mao sab ang nangu sa napildeng IBL Legend nga miposa’g 17 puntos. Si IBL president Peter Lalican mitimbre’g 12 puntos ug si Boy Alfante mitikdol og 10 puntos.
Sa laing bahin, si Cocoy Dequit mipaksit og 27 puntos, samtang si Ricboy Nacario mikadlit og 26 puntos alang sa HLY Selection nga yano kaayong miiskor og daog.
Gipangulohan sab ni Joseph Lim ang naparot nga Inayagan All-Star pinaagi sa iyang 19 puntos, si Ronald Duterte miamot og 16 puntos, samtang si Ben Lariego miabuno’g 10 puntos.
Ang mga duwa gidumala sa Cebu Basketball Referee Association (CEBRA) sa pagpangulo ni Edwin Dejacto inabagan ni Tedy Cabanada.
Puntos matag usa
Unang duwa:
(50-above)
HLY (94) – Ceballos 24, Cabrera 19, Arias 12, Ebrado 10, Dela Rama 8, Yosores 8, Lastimosa 4, Mosqueda 4, Yosores 3.
IBL LEGEND (89) – Rabaya 17, Lalican 12, Alfante 10, Encallado 9, Taran 8, Nebria 7, Bacio 5, Gimepa 4, Atillo 4, Calledo 4, Plarisan 2, Lim 2.
Ikaduhang duwa:
(40-above)
HLY SELECTION (101) – Dequit 27, Nacario 26, Sumargo 11, Tantay 9, Mercado 6, Alcordo 6, Capala 3, Nacional 2, Utos 2.
INAYAGAN ALL-STAR (86) – Lim 19, Duterte 16, Lariego 10, Gerasmeo 5, Gimeda 6, Rabadon 6, Encallado 4, Bastatas 4, Geozon 2, Fernandez 2. (BANAT NEWS)
- Latest
