Aldeguer ‘Best Promoter’ sa 15TH Elorde awards
CEBU, Philippines - Si ALA Promotions President and CEO Michael Aldeguer maoy ginganlan isip ‘Best Promoter’ ug modawat sa iyang award atol sa 15th Gabriel ‘Flash’ Elorde Boxing Awards Banquet of Champions sa Marso 25 didto sa Manila Hotel.
Sa suwat gikan ni Johnny Elorde, ang CEO sa maong awarding ceremony, si Aldeguer pasidunggan tungod sa mga lakang sa ALA Promotions nga mipalambo sa boksing pinaagi sa mga local ug international promotions.
Ang ALA Promotions gitumbok nga usa sa mga yawi sa pagkakaplag sa mga Pinoy champions pinaagi sa ilang malampusong Pinoy Pride series.
“This award is not only for me but for the promotional company itself,” matud pa ni Aldeguer. “I like to thank all boxers, media and all the people behind (ALA Promotions) for making this possible.”
Gipasalamatan usab ni Aldeguer ang iyang amahan nga si Antonio ‘Bidoy’ Aldeguer, ang founder sa nabantog nga Cebu-based boxing outfit.
Gawas ni Aldeguer, laing duha ka personalidad sa ALA Gym nga sila si reigning IBF Inter-continental super bantamweight champion ‘Prince’ Albert Pagara ug trainer Edmund Villamor ang makadawat sab og award.
Si Pagara maoy gibayaw nga ‘Most Promising Boxer,’ samtang si Villamor maoy giila isip ‘Best Trainer’.
Ang maong awarding ceremony himuon atol sa ika-80 nga birth anniversary sa boxing legend nga si Elorde, ang labing unang Pinoy boxer nga nalakip sa International Boxing Hall of Fame. (BANAT NEWS)
- Latest
