Sultan mipaundang ni Mancio sa ala cobra boxing
CEBU, Philippines – Miiskor og dakung kadaugan si light flyweight Jonas ‘Zorro’ Sultan (7-2, 5KOs) nga wala damha mi-KO ni kanhi OPBF title challenger Jerson ‘Smooth Operator’ Mancio (18-6,9KOs) sa main event sa ALA Promotions-Cobra Energy Drink 'Tunay na Lakas Boxing' niadtong Sabado sa gabii didto sa Murcia Sports and Cultural Center sa Murcia, Negros Occidental.
Mas abtik si Sultan nga nakapatugpa og mga kinumo ngadto ni Mancio, sa wala pa siya mikonekta og usa ka bangis nga head and body combinations nga mipahagsa sa nauwahi sud sa 2:11 sa fifth round.
Sa supporting main event, ang taga-Mandaue City nga si Geo ‘Santino’ Santisima (5-2, 4KOs) mihimo usab og upset nga kadaugan batok ni kanhi amateur standout Boyce ‘Astro Boy’ Sultan (8-5, 5KOs).
Mipatigbabaw ang kusog ni Sultan, kinsa miangkon sa technical knockout nga daog sa sixth round.
Sa undercards, si Jefcon Concerman midaog pinaagi sa unanimous decision batok ni Raul Yu. Midaog sa puntos si Peter Apolinar batok Ryan Quimbo, si Virgil Vetor midaog batok Kenneth Neron, si Jopher Montano midaog batok ni Paul Varona, Junnel Borlado midaog pinaagi sa desisyon ni Ernesto Alera ug si Elmer Liboon mi-KO ni Richard Lomugdang sa first round.
Sa laing bahin, agi’g paglingaw sa iyang mga katagilungsod, si two-division world champion Donnie ‘Ahas’ Nietes mipahigayon og upat ka rounds nga exhibition match batok ni ALA prospect Gerard Suico.
Si Nietes mohimo sa iyang ring comeback sa Marso 28 didto sa SM Mall of Asia Arena sa main event sa Pinoy Pride 30 batok Mexican Luis ‘Gallo’ Ceja. (BANAT NEWS)
- Latest
