CVIRAA meet banatan karon

CEBU, Philippines – Mosugod na ang Cebu City Niños sa ilang kampanya alang sa laing overall championship sa 2015 Central Visayas Regional Athletic Association (CVIRAA) Meet nga buksan karon didto sa E.S Binghay Memorial Sports Oval sa Balamban, Cebu.

Bisan og banatan na ubang duwa karon, apan  ang opening ceremony ugma  pa ipahigayon.

Ang Cebu Niños maoy naghari sa maong multi-sporting event sud na sa kapin duha ka dekada ug wala sila’y plano nga ihatag ang ilang korona.

Hinuon, ang Cebu Province may dautang laraw tungod kay gusto nila nga mohimo og surprisa pinaagi sa ilang napalig-on nga sporting commission ug ingon man ang pag-host  sa maong regional meet.

Kasagaran sa mga duwa adto himuon sa Balamban gawas lang sa swimming nga anhi ipahigayon sa Cebu City Sports Center (CCSC) aquatic pool.

Gawas sa Cebu City ug Cebu Province, laing mga delegasyon nga mobanat mao ang Mandaue City, Talisay, Naga, Carcar, Toledo, Bogo, Danao, Lapu-Lapu, Tagbilaran, Bais, Dumaguete, Tanjay, Guihulngan  ug Bayawan uban sa mga probinsiya sa Bohol, Siquijor ug Negros Oriental.

Mga sporting disciplines nga tigian naglakip sa archery, arnis, athletics, badminton, baseball, basketball, boxing, chess, football, gymnastics, sepak takraw, sepak takraw junior, softball, swimming, table tennis, taekwondo, tennis ug volleyball.

Adunay upat ka demo sports sama sa futsal, billiards, wrestling ug wushu.

Idungan sab sa pagpahigayon ang SPED Olympics nga salmotan sa mga tinun-an sa Special Education Program sa DepEd.

Ang lima ka adlaw nga athletic meet magsilbeng qualifying alang sa Palarong Pambansa nga gitakda karong summer didto sa Tagum City, Davao del Norte. (BANAT NEWS)