ERCO BRO Nationals nakadepensa sa men’s title sa 12th thirsty cup

CEBU, Philippines – Bisan og wala miduwa ang sagad kuhaon nilang imports gikan sa Philippine Azkals, ang Team ERCO BRO Nationals nagmalampuson gihapon pagdepensa sa ilang men’s open title sa 12th Thirsty Football Cup nga natapos  niadtong Domingo diha sa Cebu City Sports Center.

Human mikulit og 3-1 nga kadaugan batok sa Don Bosco Alumni-A, nakasustinir ang ERCO BRO sa ilang kainit aron pakgangon ang We United FC, 2-0, sa ilang duwa sa kampiyonato. Sila si Stephene Meleke ug Dan Villarico maoy milansang sa duha ka winning goals sa ERCO BRO. Gumikan sa maayong labok nga iyang gipakita sa tulo ka adlaw’ng torneyo, si Villarico maoy gitunolan sa  MVP trophy.

Mao kadto ang ikatulong titulo sa ERCO BRO kay gidominar man sab niini ang 38-above ug boys 23-under categories.

Sa women’s open, si Lanie Amistoso maoy nahimong bida sa dihang gibuntog sa Aficionados de Futbol ang Chicos United, 2-0 aron pagsakmit sa korona.

Ang Paref-Springdale maoy hawod sa boys 18 human gipakaging ang Don Bosco Technology Center, 2-0, samtang ang Santa Barbara sa Iloilo maoy mipatigbabaw sa girls class human gipukan ang mga Bosconians. Sila si Sabin Veloso ug Laurence Soriano maoy gibayaw nga MVP sa tagsa-tagsa nila ka dibisyon. Si Arantxa Trebol maoy MVP sa dihang ang Sacred Heart School-Ateneo de Cebu mipilde sa Real Galaxy, 3-0 sa finals ubos sa girls 15 age group. (BANAT NEWS)