Carlo Biado runner-up ra sa World 10-ball tourney
CEBU, Philippines – Wala kaugpo ang mga Pinoy’ng bilyarista gumikan kay ang bugtong paglaum nga si Carlo Biado napakyas sa iyang kampanya sa kampiyonato sa 2015 MP Cup World 10-ball Championship sa miaging gabii didto sa General Santos City.
Si Biado mimakmak ni David Alcaide sa Spain, 11-2 sa semifinals, apan wala siya makalahutay sa iyang kainit kay gipilde siya sa Taiwanese nga si Ko Pin Yi, 11-9 sa final match.
Hapsay kaayo ang dagan sa mga tirada ni Ko gumikan kay sud lamang sa 20 minutos, miposte gilayon siya og 4-0 nga bentaha. Si Biado nakaduol sa iskor nga 2-5, apan miresbak sab dayon si Ko aron pag-inat pa sa iyang bentaha, 9-2.
Bisan pa man niini, mipakita gihapon og maayong labok ang 31-anyos nga si Biado hinungdan nga nakasikit kini, 7-9. Iya pang gipakuratan og maayo si Ko nga milabaw na lamang og uno punto niadtong tungora, 10-9.
Apan wala na misaler pa ang madyek ni Biado gumikan kay sa ika-20 nga rack, si Ko mipasud og upat ka bola sa iyang pagburak dayon na ngadto sa paglansang sa Pinoy niyang kontra aron pagsakmit sa labing una niyang world title.
Si Ko mibulsa og $40,000 sa iyang kadaugan, samtang si Biado nakadawat og $20,000. (BANAT NEWS)
- Latest
