CEPCA february qualifying tourney karon nang hapon

CEBU, Philippines - Ang February edition sa Cebu Executives and Professionals Chess Association (CEPCA) monthly qualifying tournament banatan karong alas-2 sa hapon diha sa Handuraw Pizza sa may dalan Gorordo, ning dakbayan.

Si CEPCA sports committee chairman Jun Olis nagkanayon nga ning tuiga, ang mga partisipante gibahin sa duha ka grupo - A alang sa mga magduduwa nga taas kaayo og ratings ug B alang sa mga average ug lower-ranked players. Ila kining gihimo aron mahimong balanse ang kompetisyon ug ingon man makaagni sa uban nga kanunay mosalmot sa binulan nilang torneyo.

Gawas niini, gibuhi sab sa CEPCA ang ilang 'Kids Program" diin ang mga anak sa ilang miyembro makahimo pagpakita sa ilang abilidad. Sa gihapon, bahinon sila segun sa ilang skills level.

Gawas sa ganting salapi, ang nag-unang duha ka mananaog makaangkon sab og luna sa grand finals nga gitawag sab og 'Battle of Champions' karong Disyembre.  (BANAT NEWS)