Kiamco sud sa last 16

CEBU, Philippines - Si Warren Kiamco mao na lang ang bugtong Sugbuanon nga nahibilin human sila si Ruben Cuna ug Anton Raga nangatagak sa 2015 MP Cup World 10-ball Championship kagahapon sa General Santos City.

Gipukan ni Kiamco si Karol Skowerski sa Poland, 11-8, sa wala pa niini pakganga ang Briton nga si Darren Appleton, 11-5 aron pag-angkon og luna sa last 16.

Apan sila si Cuna ug Raga, nga pulos gipaluyohan sa Cebu City Sports Commission pinaagi ni commissioner Lorenzo ‘Chao’ Sy, hingpit nang nanamilit sa torneyo. Si Cuna midaog batok ni Denis Grabe sa Estonia, 11-4, aron mosulod sa final 32 knocktout stage, apan wala kini makalahutay human gipalagpot ni Ruslan Chinakhov sa Russia, 11-8, samtang si Raga kutob lamang sa last 64 kay nahisukamod kini sa mga kamot ni Karl Boyes sa Great Britain, 11-7.

Lain pang garbo sa Sugbo nga si Antonio ‘Gaga’ Gabica sayong natagak human gipilde ni Appleton sa loser's bracket.

Pipila sa mga paboritong Pinoy ang nangataktak na sab sama nilang  Dennis Orcollo, Francisco Bustamante ug Ronnie Alcano.

Ang singles event sa maong usa ka semanang kumbati nga gipasiugdahan ni boxing superstar Manny Pacquiao inabagan sa World Pool Association matapos karong adlawa. Ang makampiyon mobulsa og $40,000 (P1.76 million), samtang ang runner-up modawat og $20,000. (FREEMAN)