Mga Pinoy miarangkada sa World 10-Ball C’ships
CEBU, Philippines – Daku og purohan nga mga Pinoy’ng bilyarista ang manghawod sa 2015 MP Cup World 10-ball Championship nga kasamtangan karong gikumbatihan didto sa SM City-General Santos.
Kini gumikan kay 43 sa 128 ka players nga miabante ngadto sa group stage pulos mga Pinoy.
Si kanhi world champion Francisco ‘Django’ Bustamante maoy nag-una sa listahan sa mga pambato sa nasud nga naglakip sab nilang Dennis Orcollo, Lee Van Corteza, Carlo Biado, Warren Kiamco, Antonio Gabica, ug Ronnie Alcao.
Moapil sab unta si Efren ‘Bata’ Reyes, apan misibog kini gumikan kay namatyan og kabanay.
Hinuon lisud nga tahas ang sagubangon sa mga Pinoy kay dekalibre man sab ang ilang banggaon sama nilang Darren Appleton ug Karl Boyes sa England, Mika Immonen sa Finland, Nick Ekonomopolous sa Greece, Albin Ouschan sa Austria, ug Thorsten Hohmann ug Ralf Souquet sa Germany.
Hait sab ang mga entrante gikan sa Chinese-Taipei (Taiwan) nga naglangkob nilang Ko Pin Yi, Ko Ping Chung, Chang Jung Lin, Fu Chei Wei ug Yang Ching Shun. Angay nga tan-awon sa habig sa China mao silang Lui Haitao, Li Hei Wen ug Wang Can.
Ang makampiyon sa maong torneyo mobulsa og $40,000 (P1.76 million), samtang ang runner up makadawat og $20,000. (BANAT NEWS)
- Latest
