Enriquez naghari sa Rapid Chess Club Tournament

Gipakyaw og daog ni NM Rogelio Enriquez Jr. ang pito niya ka mga duwa aron modominar sa  Rapid Chess Club Open Tournament nga natapos niadtong Domingo didto sa E-Mall Activity Center.

Si Enriquez mipukan ni Venancio Loyola Jr. sa katapusan niyang duwa aron tapuson ang maong 7-round Swiss system competition bitbit ang labing taas nga 7.0 puntos.

Si Rhenzi Kyle Sevillano, nga mitak-op sa iyang kampanya pinaagi sa pagpakaging ni Carlos Moreno III, mipahiluna sa ikaduhang dapit uban ang 6.0 puntos, samtang si Yves Christian Fiel mipilde ni Ramil Wadim ug mao kadto ang iyang gikinahanglan aron sakmiton ang ikatulong puwesto uban ang 5.5 puntos.

Naglangkob sa top 8 nga dunay 5.0 puntos matag usa mao sila si Loyola, Arnolito, Cadiz, Allan Salientes, Diego Claro ug Carlo Maraat. Nipatong sa top 12 sa nakulit nilang 4.5 puntos mao sila si Wadim, William Retanal Jr., Moreno  ug Marq Gabriel Balbona.

Ang duha ka adlaw nga torneyo, ubos sa superbisyon ni Atty. Richard Abangan inabagan nilang FIDE Arbiters Marvin Y. Ruelan ug Felix Poloyapoy Jr., nagmalampuson gumikan sa suporta nilang Joselito Posas ug Oscar Abangan. (BANAT NEWS)