Raga napilde na sab
CEBU, Philippines – Napilde na sab sa ikatulong higayon sa qualifying round didto sa General Santos City ang 2015 Sinulog Cup champion nga si Antonio Raga ug karong adlawa maoy kataposan higayon nga makasalmot sa MP International 10-Ball Billiards tournament didto sa SM City Gensan.
Si Raga nahiagom og 5-7 nga pilde sa ilang race to 7 match-up batok ni Christian Garandia sa Iloilo City.
Napilde sab ang laing pambato sa Sugbo nga si Elaga Abellana kang Emilio Martinez, 6-7 apan sama kang Raga, duna pa siya'y laing kahigayonan karong adlawa.
Bugtong paglaum sa Team Cebu City ubos sa pagpaluyo sa Cebu City Sports Commission (CCSC) mao silang Ruben Cuna ug Butch Augusto.
Bisan pa sa ilang kapildehan, malaumon gihapon ang CCSC Commissioner nga si Lorenzo "Chao" Sy nga makabangon ang duha ka Sugboanong bilyarista.
Matod pa ni Sy nga basin unta ubanan og swerte silang Raga ug Elaga karong adlawa.
Sa iyang text message ngadto kang Allan Cortes nga maoy escort sa Team Cebu, si Sy nagkanayon "good luck to our four cue artists. Please play your best and the people in Cebu are praying for your success. Play with your hearts out. Let them prove that I am sending the right players to represent Cebu City. You all should be proud as members of Team Cebu." (BANAT NEWS)
- Latest
