Kian Cyrus, Orlmon nag-una sa ilang dibisyon sa CBBL Caging

CEBU, Philippines - Ang Kian Cyrus ug Orlmon teams mikulit sa ilang ikaduhang sunod-sunod nga daog aron magsolo sa liderato sa tagsa-tagsa nila ka bracket sa 3rd Consolacion Barkadahan Basketball League (CBBL) cagefest niadtong Domingo sa gabii didto sa Barangay Pulpogan gym sa lungsod sa Consolacion, amihanang Sugbo.

Ang Kian Cyrus mipukan sa Shadow Hunters, 72-65  nga temporaryo karong nag-una sa bracket-A sa ilang 2-0 win-loss record, samtang ang Orlmon  mipilde sa  GT-Flying V, 93-89 ug mao sab ang nag-una sa bracket-B  sa ilang 2-1 nga baraha.

Nangu sa maong kadaugan mao si Joenard Pales, kinsa mipabuhagay og 24 puntos, lakip na niini ang tulo ka three-pointers.  Nakatampo sab og daku  si Danny Nillas  pinaagi sa iyang 21 puntos  kansang tulo ka sunod-sunod nga tira maoy nakapalabaw sa Kian Cyrus, 24-22 sa nahabiling 2:50  sa second period.

Si Randy Povadora mao sab ang nangu sa  Shadow Hunters nga miposa’g 24 puntos, gisundan ni Alner ‘Skye’ Mercado pinaagi sa iyang 13 puntos,  lakip na ang duha ka  sunod-sunod nga three-point shot.

Sa laing bahin, si J. Mondarte mikadlit og 17 puntos aron maoy mangu sa Orlmon, samtang ang nangu sa napildeng GT-Flying V mao si Jonathan Manzo, kinsa mikulit og game-high 52 puntos, samtang si Adonis Obiña mitimbre’g  15 puntos.

Ang Shadow Hunters ug  GT-Flying V parehong nagbitbit og 0-2 nga baraha ning maong liga nga gipaluyohan sa Erika’s Delight Bakeshop ug Rich Banana Catsup.

Gipaluyohan sab kini sa VIMBRA ubos sa mga paningkamot ni league commissioner Edward Escorial inabagan nilang Noel Calo, Kenneth Tagalog ug Rey Cortes.

PUNTOS MATAG USA

Unang duwa:

KIAN CYRUS (72) –  Pales 24, Nillas 21, Larobis 8, Plaza 8, Reserva 4, Conde 4, Iting 3.

SHADOW HUNTERS (65) – Povadora 24, Skye 13, Lastimosa 11, Paulo 5, J. Obiña 4, Clark 4, Ernan 3, Glenn 1.

Ikaduhang duwa:

ORLMON (93) – J. Mondarte 17, Cabilana 16, Y. Aligway 12, O. Mondarte 10, Javer 10, K. Quitay 9, Comiso 8, R.R. 6, T. Quitay 2.

GT-FLYING V (89) – Manzo 52, A. Obiña 15, Ibao 9, Capuyan 8, Ocio 2.