Pinay belles kagrupo ng South Korea sa Asian Women’s C’ships

MANILA, Philippines - Nagrupo ang Pilipinas sa South Korea, Australia at Kazakhstan para sa 18th Asian Women’s Volleyball Championship sa Beijing at Tianjin sa China.

Ang kompetisyon ay na­katakda sa Mayo 20-28 at ang Pilipinas at mga ka­samang bansa ay nasa Pool D matapos ang isinagawang draw kamakailan.

Awtomatikong kasali ang Pilipinas sa kompetis­yon kasama ang 16 bansa dahil nagpadala ang Philippine Volleyball Fe­deration ng koponan no­ong 2013 sa Nakhon, Rat­chasima sa Thailand.

Tumapos ang bansa sa ika-12 puwesto at tinalo ang mga bansang Myanmar at Sri Lanka.

Ngunit nasa balag ng ala­nganin pa ang partisipasyon ng women’s team dahil sa gulo sa liderato ng sport.

Nagtatag ng bagong pe­derasyon si POC 1st Vice President Joey Romasanta ng Larong Volleyball ng Pilipinas para ipalit sa PVF at may inisyal na re­kog­nisyon ang grupo mula sa international volleyball fe­deration (FIVB).

Kailangan lamang na mag­luklok ang LVP ng mga opisyales hanggang Peb­rero 15 at kung hindi ay babawiin ang pagkilala at masususpindi ang bansa.

Ngunit nagulong muli ang sitwasyon dahil ipinag-utos ni POC president Jose Cojuangco Jr. kay Roma­san­ta na bitiwan niya ang LVP at ibigay sa dating PA­VA president at dating ka­samahan sa Kongreso na si Victorico Chavez.

Si Chavez ay kabahagi ng PVF at nais din niyang bitbitin ang ibang opisyales ng binubuwag na pederas­yon.

Ang nagdedepensang kampeon sa Asian Wo­men’s na Thailand ay naka­sama ng Chinese-Taipei, Hong Kong at Sri Lanka sa Pool B.

Ang host China ay kabilang sa Pool A kasama ang Iran,Fiji at In­dia, samantalang ang Ja­pan, Vietnam, Mongolia at Turkmenistan ay nasa Pool C.

Ang mangungunang tat­long bansa matapos ang torneo ay papasok sa World Olympic Qualifi­cation Tournament na na­ka­takda sa Mayo 2016.