Borgonia, Pepito hawod sa first round sa Cebu Kiddies Chess
CEBU, Philippines – Sila si Duane Borgonia ug Jeremy Pepito maoy nanghawod sa labing unang qualifying event sa 2nd Cebu Kiddies Chess Championship niadtong Domingo didto sa Cebu School of Chess nga anaa mahimutang sa ikaduhang andana sa Central Books Building sa may dalan P. del Rosario, ning dakbayan.
Gitapos nilang Borgonia ug Pepito ang maong 7-round Swiss system bitbit ang managsamang 6.0 puntos, apan si Borgonia maoy mipatong sa unang puwesto gumikan sa mas taas niining tie-breaker.
Gawas sa ganting salapi nga ilang nadawat, ang duha nakaangkon sab og luna sa grand finals nga gikatakda karong Disyembre.
Si Adrian Basilgo maoy mipahiluna sa ikatulong dapit sa nakulit niining 5.5 puntos, samtang sila si Aldritz Pondoyo ug Marphine Mangubat nagsawo sa ikaupat ug ikalima nga puwesto sa natali nilang 5.0 puntos.
Nagkumpleto sa top 11 finishers mao sila si Alphecca Gonzales, Vixc Glysen Derotas, Alphard Gonzales, Mykha Borgonia, Jave Peteros ug Edel Vosotros.
Si tournament director IM Kim Steven Yap mihatag sab og special awards ngadto nilang Spica Gonzales ug Uriel Donceras isip labing bata nga mga entrante.
Sa laing bahin, kadtong gusto moapil sa sunod nga edisyon sa maong binulan nga torneryo mahimong motawag ni Kim Yap sa 0932-3510816 o dili ba e-mail sa cebuschoolofchess@ gmail.com o [email protected]. (BANAT NEWS)
- Latest
